GLADHEN MAMBIWARA NGUNDHUH TEMANTEN

 

Ancer-ancer Rantaman Adicara Ngundhuh Temanten

(Pasrah tampi temanten dereng kalenggahaken) 

 

Hangrantu rawuhipun para tamu, saged kaungelaken gendhing2 mana suka

Menawi penganten sarimbit tuwin para pangiring sampun rawuh lan badhe manjing ing wisma palereman saged kabiwadha ungeling Monggang

Menawi penganten sarimbit, para paraga pasrah tampi  tuwin para pangiring sampun siyaga ing karya , pambiawara saged hambuka adicara/maos rantaman adicara.

Manjingipun  temanten sarimbit ing sasana pahargyan sasampunipun wonten sasmita saking pambiawara. Rantaman adicara karacik kados makaten :

1.    Pambuka

Gendhing pangiring : Ktw. Mijil Wigaringtyas Pl. 6

 

2.    Manjingipun putra temanten sarimbit ing sasana pahargyan

Gendhing pangiring : Ktw, Boyong Basuki Pl. Br.

 

3.    Pangandikan pasrah tuwin atur panampi

(Paraga pasrah-tampi, pangapit, pangampil tirta wening, pangampil sangsangan tuwin dhuwung sampun siyaga)

 

4.    Wisudha tali darma

Ibu……………………paring unjukan tirta wening dhumateng temanten sarimbit

Bp………………….....paring sangsangan sekar melathi rinonce dhumateng temanten kakung tuwin paring sipat kandel / pusaka dhuwung

 

5.    Atur pambagyaharja

6.    Gendhing2 manasuka  (para tamu jawat asta + dhahar)

7.    Paripurna

 

  

 

Ingkang prayogi kacawisaken :

·         Kursi temanten kakung lan putri

·         Kursi pamengku gati sarimbit

·         Kursi besan sarimbit

·         Kursi tamu sacekapipun

·         Meja buku tamu

·         Meja tata dhahar  lan unjukan

·         Mic : sakboten-botenipun 2 kangge pambiwara lan pasrah -tampi

·         Nampan 2 ( tirta wening  lan sangsangan  tuwin dhuwung)

 

Paraga :

·         Pangandikan Pasrah

·         Pangapit Pasrah piyantun 2

·         Atur Panampi

·         Pangapit Panampi piyantun 2

·         Pangampil baki - gelas tirta wening

·         Pangampil baki - sangsangan mlathi lan dhuwung

·         Pambagyaharja

·         Pangapit Pambagyaharja piyantun 2

·         Pambiawara

 

  

 

Tuladha Pambiawara Murwakani Adicara

 

Nuwun, kula nuwun.

Sih nugraha miwah wilasaning Gusti Ingkang Maha Welas tuwin Maha Asih mugi tansah kajiwa, kasarira panjenengan sedaya lan kula sumarambah sagung kulawarga, widada niskala.

Para alim ulama ingkang tansah dados panuntun wedharing laku utama. Para sepuh, aji sepuh ingkang satuhu pana ing kawruh. Para pangemban pangembating praja ingkang pantes sinudarsana. Para tamu kakung putri ingkang satuhu munulyeng budi.

            Minangka purwakaning atur, sumangga kula dherekaken tansah ngonjukaken  puja pudyastuti dhumateng Gusti Ingkang Hamurbeng Dumadi. Inggih awit saking kanugrahanipun dhumateng panjenengan sadaya lan kula satemah saged makempal manunggal ing dalemipun Bapa/ Ibu………………………kanthi kebak ing karaharjan, sinartan panyuwunan, mugi salwiring gati wiwit purwa, madya dumugi wasana kinalisaken ing rubeda.

 

 

GANTOS PARAGA

 

 Ing ari punika, Raditya Palguna inggih Minggu Pon  katiti  surya kaping 20 Desember warsa 2015, keparengna kula sakadang jejer pambiwara kinen ndherekaken tata rakiting adicara  pahargyan ngundhuh temanten   nuwuninggih Bagus……………., atmaja kakungipun Bp/ibu…………………..….kaliyan Nimas Ayu…….……….……putri kinasihipun Bp/Ibu………………….

Adicara kapurwakan kanthi pambuka, kalajengaken adicara kaping kalih nuwun inggih praptaning putra temanten sarimbit ing sasana pahargyan.

Adicara kaping tiga inggih punika babaring pangandikan pasrah saking kulawarga Bp/Ibu……………………tuwin atur panampi saking baraya agung  Bp/Ibu………………

Saparipurnaning adicara pasrah tampi risang panganten sarimbit,  tumunten kalajengaken adicara wisuda tali darma. Adicara kaping gangsal inggih punika  atur pambagyaharja.  Parandene adicara kanem nuwun inggih panutup.

Makaten menggah reroncening adicara ingkang badhe hangrenggani pahargyan ngundhuh temanten ing wanci siyang punika.  Kanthi andhap asoring manah kula nyuwun idi sarta pangestu dhumateng para sepuh miwah para tamu adicara tumunten badhe kawiwitan.

 

GANTOS PARAGA

Tuladha Panyandra Manjingipun Temanten Sarimbit

 

Lamat-lamat kapiyarsa swaraning pradangga ambabar Ketawang Boyong Basuki.  Tan pantara dangu katon tejane, sumunar cahyane.  Lha punika tejane pinanganten sarimbit kang mijil saking wisma palereman arsa manjing ing sasana pahargyan.  

Cetha kalamun panganten sarimbit wus satraju boboting katresnan. Anggenira lumaksana tansah pepuletan asta datan ginggang sarekma pinara sasra.  Kekalihira satuhu wus trep pindha curiga manjing jroning warangka.  Sanadyan kang sajuga jejer priya kang sawiji putri parandene kekalihira wus manunggal ing cipta, rasa myang karsane.

 

GANTOS PARAGA

 

Jroning lumaksana tansah  ambabar esem kang sarwa manis , ing semu kejawi hangaturaken agunging panuwun, nanging ugi tansah nyuwun tambahing pangestu dhumateng sagung para tamu, murih sembada ingkang sinedya, jumbuh kang ginayuh, dadi kang kaesthi.

Temanten sarimbit kang apinda nata miwah prameswari  tindak lon-lonan tumuju unggyan kang sinedya nuwun inggih sasana pasrah tampi.  Tandang tanduke, lumaksanane  panganten sarimbit  ingkang tansah runtang-runtung rerentengan, tansah gawang-gawang raketing sih katresnan.

Wus dumugi unggyan kang sinedya, nuwun inggih sasana pasrah tampi, tindakira pinangantyan sarimbit  gya kandeg hangrantu laksitaning adicara ingkang sampun tinata.

 

GANTOS PARAGA

 

Aturipun panatacara badhe Pasrah Tampi

 

Sagung para tamu kakung miwah putri ingkang sinuba ing pakurmatan

Temanten sarimbit miwah para pangiring ingkang dipunpandhegani Bapa……… sampun kandheg ing sasana pasrah tampi.  Kanthi makaten mracihnani badhe lumadi adicara pasrah tampi.

Wedharing sedya saking baraya agung  Bp/Ibu…………….…….. badhe kasarira Bp………………..ingkang jumeneng jinajaran  Bp………..………tuwin Bp……………… Parande tumanggaping gati saking kulawarga Bp/Ibu……………….badhe kasalira Bp……….….……jinajaran Bp……………..……..lan Bp…………………..

Katur dhumateng Bp………………..tuwin Bp……………….sumangga

 

Paraga pasrah jumeneng aben-ajeng kaliyan paraga panampi.

(kaprayogekaken sembah kalbu saderengipun medhar pangandikan)

 

GANTOS PARAGA

 

Aturipun panatacara purna Pasrah Tampi / badhe Wisuda Tali Darma

 

Wijang wijiling pangandikan ambabar gatining sedya, priyagung kekalih daya-daya samya ajejawat asta tumuli kalajengaken adicara wisuda tali darma.

Ibu……………….paring unjukan tirta wening dhumateng putra temanten sarimbit.

Paring unjukan tirta wening minangka pralambang panyuwunan dhumateng Gusti Ingkang Hamurbeng Gesang, ing pangajab sedaya tindak tanduk, muna-muni kapenggaliha kanthi wening lan menep murih pratitis anggenya tumindak datan nalisir ing paugeran.

 

GANTOS PARAGA

 

Paripurna pinaringan unjukan tirta wening, temanten kakung gya sinangsangan sekar melathi rinonce dening Bp…………………… salajengipun nglolos dhuwung ingkang dipun-agem temanten kakung kagantos  pusaka / sipat kandel paringipun ingkang rama. 

 

Temanten kekalih sigra ajejawat asta dhumateng Ibu tuwin Bapa………….…….

Datan kantun, Bapa/ Ibu……………ugi manembrama rawuhipun besan sarimbit nuwun inggih Bapa/Ibu…………………..kanthi ajejawat asta, tumunten kadherekaken tut wuri tindak tumuju ing sasana rinengga.

            Wus unggyang kang tunuju hanenggih dampar rinengga, pinangantyan sarimbit, kaapit rama miwah ibu piyantun sepuh catur gya lenggah ing kursi pinasri.  

 

GANTOS PARAGA

 

Sri atmaja temanten kekalih tumungkul wadanane, lon-lonan lumampah arsa lenggah ing dampar rinengga. Rama ibu kang tansah tut wuri handayani, samya bombong jroning pengghalih, dupi hamriksani pinanganten sarimbit sangsaya wuwuh suka ing wardaya.  para pepundhen  catur,  pindhane kadya kajugrugan wukir sari karoban samodra madu, dupi hamriksani kathahing para tamu ingkang samya kepareng rawuh. Katingal para tamu samya karenan jroning penggalih, pratandha suka jumurung hastuti mring kang lagya hanawung darmaning asepuh.

Tan rinasa, ing mangke risang penganten sarimbit wus ngancik unggyan kang tinuju, hanenggih dampar pinasri. Para pepundhen catur nuwun inggih piyantun sepuhipun temanten gya lenggah ing kursi piniji

 

GANTOS PARAGA

 

Aturipun panatacara badhe Atur Pambagyaharja

 

Sagung para tamu ingkang satuhu minulyeng budi, sampun paripurna kanthi widada datan manggih rubeda, rahayu boten wonten reridu adicara wisuda tali darma temanten. Salajengipun pamangku gati, Bp/Ibu………………..arsa atur pambagyaharja katur panjenengan sedaya. Atur pambagyaharja saking pamangku gati badhe kasarira Bp……………………..……… ingkang jumeneng jinajaran Bp…………..……………tuwin Bp……………………………..

            Katur ingkang kinurmat Bp…………….………….sasana miwah suwasana sumangga.

 

--sasampunipun paraga pambagyaharja lengser, kabiwadha Lcr. Kebogiro—

 

Aturipun panatacara purna  Pambagyaharja

 

            Paripurna babaring             atur pambagyaharga saking pamangku karsa ingkang kasarira Bp………………………….

            Para tamu kakung miwah putri ingkang satuhu luhuring budi, inggih awit agunging raos suka sokur konjuk dhumateng Gusti,    ing titi wanci punika pamangku gati Bp……………………..sekaliyan garwa atur pasugatan dhahar ingkang sampun tinata ing sasana boga.

Katur dhumateng baraya agung  Bp……………………………tuwin para tamu, keparenga jawat asta kaliyan pamangku gati miwah besan sarimbit sinartan paring donga pangestu dhumateng temanten sarimbit.

Salajengipun keparenga ngrahapi pasugatan ingkang sampun rinakit dening para panawung kridha sinambi hamirsani/ midhangetaken panglipur …campursari ringkes setya tuhu…ingkang mijil saking Gunungpati, nuwun.

 

-       Pambiwara prayogi atur pambayaharja wongsal-wangul wekdal lelangen gantos gendhing / lagu --

Tuladha mungkasi adicara ngunduh manten

 

Para tamu kakung-putri ingkang winengku ing suka basuki, para sutresna budaya ingkang bagya lan mulya, kados sampun paripurna  tumapaking adicara ngundhuh temanten ing wanci punika,  wiwit purwa, madya dumugining wasana.

Dhumateng para sepuh, pini sepuh sumarambah para tamu sedaya, lumantar kula,  pamangku gati Bapa/Ibu……………………………….sakulawarga  ngambali ngaturaken agunging panuwun awit kepareng rawuh tuwin paring donga pangestu panjenengan sedaya dhumateng temanten sarimbit.

Kula sakadang nglenggana anggen kula nindakaken ayahan temtu wonten tuna dungkaping atur miwah solah bawa, cecer cewet adamel kuciwa, keparenga ingkang hamengku karsa miwah para tamu paring pangsaksama.

Sumangga asesanti : Jaya jaya wijayanti mugi rahayu ingkang samya pinanggih, Nuwun.

 

 

 

 

 

Tuladha pambagyaharja dening panatacara  (wongsal-wangsul)

 

Tuladha I

 

Sangya para tamu ingkang sinuba ing pakurmatan. Ing ari punika, Raditya Palguna inggih Minggu Pon  katiti  surya kaping 20 Desember warsa 2015 hanyarengi surya kaping  8 Mulud warsa 1949, Pamangku gati Bp…………………..sarimbit garwa lumantar kula ngaturaken pambagya sugeng rawuh sinartan agunging panuwun ingkang tanpa pepindhan, dene panjenengan sampun kesdu nyisihaken wekdal saha ngetheng-enthengaken salira rawuh wonten sasana pahargyan ngriki arsa paring donga pangestu dhumateng temanten sarimbit.

Mugi paring pangestu panjenengan sedaya sageda handayani dhumateng putra temanten kekalih anggenipun mangun balewisma tansah manggih kabagyan lan kamulyaning gesang.

Katur dhumateng para tamu sasampunipun ajejawat asta keparenga tumuju ing sasana boga hangrahapi pasugatan dhahar ingkang sampun tinata denging kadang-kadang panawung kridha sinambi mirsani panglipur…………….

 

 

Tuladha II

 

Sagung para tamu, salajengipun ingkang hamengku gati ugi ngaturaken panuwun ingkang tanpa upami, tumrap paring panyengkuyung panjenengan sedaya ingkang awujud bau suku, iguh pertikel, saha tandha tresna saking sanak kadang, tangga tepalih, mitra pitepangan, saha para tamu ingkang awujud punapa kemawon.

Punika sadaya sayektos adamel pangentheng-entheng sesanggeman, satemah damel rancag-gancaring pahargyan,  sarta bombonging penggalih Bp…………………….  sakulawangsa.

Sambet kaliyan sedaya panyengkuyung panjenengan kala wau, Bapa…………………….. sagotrah boten saged atur piwales punapa-punapa, kajawi amung sumarah dhumateng Ingkang Maha Mirah, mugi panjenengan sadaya pikantuk piwales ingkang linangkung.

 

 

Tuladha III

 

Para sepuh, sesepuh ingkang dhahat pinundhi, para rawuh kakung miwah putri ingkang winengku ing suka basuki. Bapa miwah Ibu…………………..sakulawangsa, anggenipun ngacarani rawuh panjenengan lugunipun sampun karantam, katata, kagantha-gantha mrih boten nguciwani. Ananging Bapa-Ibu ……..……nglenggana taksih wonten kalepatan saha kekirangan tumrap sadaya aruh, lungguh, rengkuh miwah suguh. Awit saking punika, kanthi andap asoring manah pamangku gati nyuwun agunging jalanidhi pangaksami.