GLADHEN MARAGA ING ADICARA MIDODARENI

(Midodaren rinonce pasrah sanggan)

 

Ancer-ancer Rantaman Adicara Midodareni

Calon penganten kakung tuwin pangiring sampun rawuh  (ing wisma palereman)

 

1.    Pambuka  

2.    Calon pengantin kakung tuwin pangiring manjing kalajengaken wedharing gati  lan  tumanggaping gati (pasrah-tampi)

3.    Paring unjukan tirta wening

4.    Pamasrahing ubarampe palakrami ( sanggan / srah-srahan)

5.    Pambagyaharja

6.    Babaring Catur Wedha

7.    Tilik Nitik

8.    Pangandikan pamit - Tumanggaping pamit

9.    Paring kancing gelung

10. Panutup

 

Ingkang Prayogi kacawisaken :

·         Kursi calon temanten kakung 

·         Kursi pamengku gati tuwin calon besan

·         Kursi tamu sacekapipun

·         Meja kangge nampi ubarampe

·         Baki/Nampan kangge tirta wening

·         Meja tata dhahar

·         Mic : sakboten-botenipun 2

 

Paraga :

·         Pasrah

·         Panampi

·         Pambagyaharja

·         Pambiawara

·         Warara pangampil baki tirta wening & kancing gelung

·         Pangampil Catur Wedha

 

Tuladha Pambuka Adicara Midodareni

 

Nuwun, kula nuwun,

Mugi karaharjan, kamulyan tuwin kabagyan awit peparing saking Gusti Ingkang Maha Welas lan Asih tansah tumedhak saha tumanduk, kajiwa, kasarira panjenengan sedaya lan kula sumarambah kulawarga.

Wonten ngarsanipun para pini sepuh miwah sesepuh ingkang kinabekten, para satriya manggalaning bangsa kusuma nagara ingkang pantes tinulad sinudarsana, para winasis ingkang pana ing pamawas miwah lebda ing pitutur, sarta para tamu kinurmatan.

Sumangga kula dherekaken tansah muji sokur ing ngarsaning Gusti kanthi puja pudyastuti.  Saking  sih wilasanipun, panjenengan sedaya lan kula  saged manunggal ing sasana ngriki, wigatosing sedya paring paseksen sarta  donga pangestu dhumateng calon temanten nuwun inggih Dyah Ayu…………………………atmaja putrinipun Bapa/Ibu……………………………..pidalem ing…………………………………………….. ingkang badhe jinatu krami dening Anak Mas……………………………………putra kakungipun Bapa/Ibu……………………………….ingkang pidalem ing…………………….

Kados sampun panjenengan sedaya uningani bilih ing dalu samangke kaadanan tatacara midodareni utawi puruhita.

 

Para rawuh ingkang minulyeng budi, kula minangka pambiwara keparengna mundhi dhawuh saking ingkang hamengku gati nuwun inggih Bapa/Ibu……………………..kinen ngaturaken menggah rantamaning adicara midodareni ing wekdal dalu punika.

Menggah titi laksitaning gati adicara midodareni rinacik mekaten :

Tatacara kapisan pambuka  ingkang kalajengaken  adicara kaping kalih nuwun inggih wedharing pangandikan pasrah tuwin atur panampi

 

Saparipurnaning  pasrah-tampi, Calon temanten kakung pinaringan unjukan tirta wening dening Ibu…………………………….sarta lung-tinampi ubarampe palakrami saking  Ibu/Bapa……………………….dhumateng Ibu/Bapa………………………

 

Salajengipun putra calon temanten kakung tumunten kakanthi lenggah ing papan piniji tuwin para pangiring lenggah ing papan ingkang sampun tinata dening kadang panawung kridha, tumunten lumaksana adicara pambagyaharja saking pamangku gati

Para sepuh, aji sepuh, ingkang dhahat sinungkeman,

Para rawuh kakung miwah putri  ingkang sinuba ing pakurmatan.

Minangka rantaman adicara candhakipun inggih punika wedharing Catur Wedha saking Bapa…………………………………….(ramanipun calon temanten putri)

 

Reroncening tatacara adat salajengipun nuwun inggih tilik nitik  

Parandene pethiting adicara inggih punika pangandikan pamit tuwin tumanggaping pamit ingkang rinakit paring kancing gelung saking Ibu……………………dhumateng calon temanten kakung.

 

Kanthi hanampi busana kancing gelung saking Ibu/Bapa…………………….……., punika minangka pralambang bilih calon penganten kakung siyaga badhe kawiwaha ing benjing kaliyan Dyah Ayu…………………………………..

 

Jumenengipun pamangku gati ing sangajeng wiwaraning sasana pahargyan mracihnani adicara midodareni ing wanci dalu punika sampun paripurna

 

Para sepuh, aji sepuh ingkang pana ing pamawas, lebda ing karya.   Para rawuh kakung-putri ingkang munulyeng budi. Rehning samudayanipun sampun tinata lan siyaga, keparengna adicara midodareni tumuli kawiwitan. 

 

 

 

 

Ngacarani rawuhipun Calon Pengantin Kakung

 

Sagung para tamu,  ingkang winengku ing suka rahayu,

Sampun wonten sasmita bilih Calon Pengantin Kakung kairing para kulawarga  sampun samapta ing diri siyaga ing karya arsa manjing ing samadyaning sasana puruhita.

Katur dhumateng pangarsaning lampah, Bapa…………………………………..keparenga hanganthi, mratitisaken tindakipun putra calon penganten jalu miwah para pangiring, sumangga.

 

 

 

Wirama panyandra,

 

Kawistara saking mandrawa, praptaning putra calon temanten kakung Sang Abagus………………………..……..kakanthi dening  Bapa…………….……………tuwin Bapa............................................tindak lon-lonan manjing ing sasana puruhita.

Sinten ta ingkang sinaraya hanawung kridha  minangka pangarsaning lampah nuwun inggih Bapa……………………,

Tindakira calon temanten kakung binayangkare dening para kulawarga, sanak-kadang, mitra pitepangan tuwin para sepuh datan kantun.

Calon temanten kakung tansah tumungkul, yayah konjem ing bantala wadanane, jroning driya nyenyuwun dhumateng Gusti Ingkang Maha Kawasa, mugi lestari kang kaesthi, jumbuh kang ginayuh, teka kang jinangka. Wus unggyan kang tinuju tindakira gya kendel ing punjering sasana pasrah tampa.

 

 

 

Ngacarani Pasrah-Tampi

 

Sagung para tamu ingkang dhatat kinurmatan,

Tindakipun calon temanten kakung miwah para pangiring sampun kandheg ing sasana pasrah-tampi. Adicara tumunten badhe kalajengaken nuwuninggih wedharing pangandikan saking kulawarga Bapa/Ibu……………………………….ingkang kasarira Bapa……………………..…………jinajaran Bapa…………………………………….tuwin Bapa…………………………..…...parandene atur panampi saking kulawarga Bapa/Ibu…………………….……………...lumantar Bapa………………….……………….

Jumeneningipun kaapit Bapa……………….……….miwah Bapa………………………….

 

Katur dhumateng para priyagung ingkang hanawung kridha kasumanggakaken.

 

------------------pangadikan pasrah-tampi-------------------

 

Paripurna babaring pangandikan priyagung kekalih tumunten ajejawat asta kalajengaken paring unjukan tirta wening saking Ibu………………………..dhumateng calon temanten kakung Anak Mas……………………………..

 

Kawistingal Ibu……………………….. sampun paring unjukan tirta wening dhumateng Anak Mas Bagus……………..……………..minangka pralambang katresnanipun tiyang

sepuh dhumateng ingkang putra. Tumunten putra calon mantu ajejawat asta dhumateng Bapa/Ibu………………………………

 

Rinonce adicara lung-tinampi ubarampe jejangkeping palakrami saking Ibu/Bapa…………………………………dhumateng Ibu/Bapa………………………………..

 

-------------------CPK tuwin calon besan lenggah ing papan piniji-----------------

 

Para tamu kakung putri ingkang minulyeng budi,

Bapa/Ibu………………………….……………badhe manembrama rawuh panjenengan sedaya, namung kewala awit raos bombong bingahing manah boten kuwawi matur piyambak, pramila badhe kasalira Bapa………………………………………minangka talanging basa.

 

Katur dhumateng ingkang kinurmat  Bapa………………………………..keparenga jengkar saking palengahan tumuju ing sasana medhar sabda.

 

------------------pangandikan pambagyaharja------------------

 

Tatas, titis, tetes, mentes pangandikan saking Bp…………….……….......minangka sulih sarira saking pamangku karsa.

Para tamu kakung-putri ingkang minulyeng budi,

Adicara salajengipun Bp……………………..(pamangku gati) badhe paring piwulang dhumateng calon temanten kakung kanthi maos Catur Wedha.

Awit saking punika, keparenga Anakmas………………………………tindak mangarsa ing sangajengipun Bp tuwin Ibu………………………………………….

 

----Calon pengantin kakung lan pamangku gati jumeneng aben ajeng----

----Pamangku gati maos catur wedha, calon mantu migatosaken----

 

Sampun paripurna babaring catur wedha saking Bapa……………………..dhumaetng Anak Mas……………………………ing pangajab sageda dados gegebengan anggenipun badhe mangun bale wisma ing madyaning bebrayan.

 

 

 

Para sepuh, sesepuh ingkang satuhu pana ing kawruh,

Para tamu kakung putri ingkang winengku ing karahayon,

 

Reroncening adicara salajengipun nuwun inggih Tilik nitik. Awit saking punika, katur dhumateng para ibu mugi wonten kepareng panjenengan tindak tumuju tepas wangi utawi panti pamingitanipun putra calon temanten putri, paring donga pangestu dhumateng calon temanten. Parandene para tamu kakung keparenga ngrahapi pasugatan ingkang sampun tinata wonten ing sasana boga.

 

----------tilik nitik kalajengaken pasugatan dhahar kairing panglipur---------

 

Sagung para tamu ingkang satuhu minulyeng budi,

Nglajengaken rantaman adicara ingkang sampun rinakit, pramila badhe kaadanan adicara pangandikan tuwin tumanggaping pamit, awit saking punika dhumateng ingkang kinurmat Bapa……………………………..minangka sulih sarira saking Bapa/Ibu…………………………….saha Bapa……………………..minangka talanging atur saking Bapa/Ibu………………………………..kasumanggakaken.

 

------------pangandikan pamit tuwin atur waluyan---------------

 

Paripurna babaring pangandikan priyantun kekalih, kalajengaken paring busana kancing gelung saking Ibu……………………………………dhumateng calon temanten kakung Anak Mas………………………………………..

 

----ibu maringaken busana kancing gelung, aben ajeng kaliyan calon manten kakung---

 

Calon temanten kakung sampun kepareng hanampi busana kancing gelung minangka pralambang bilih putra calon temanten kakung sampun siyaga lan ngugemi jejering satriya tama nindakaken wajib   ing dinten mbejing,…………………………………katiti surya kaping……………………………………….tabuh……………………… 

 

 

Tuladha mungkasi adicara midodaren

Para rawuh kakung-putri ingkang minulyeng budi, para sutresna budaya ingkang bagya lan mulya, kados sampun jangkep tumapaking adicara midodareni utawi puruhita ing wanci dalu punika,  wiwit purwa, madya dumugining wasana. Pramila sampun dumugi pethiting titi laksana nuwun inggih pamungkas.

Dhumateng para sepuh, pini sepuh sumarambah para tamu sedaya,              

Lumantar kula,  pamangku gati Bapa/Ibu……………………………….sakulawarga  ngambali ngaturaken agunging panuwun awit kepareng rawuh tuwin paring donga pangestu panjenengan sedaya.

Kula sakadang ingkang dherekaken  tumapaking adicara midodareni utawi puruhita ndherek dedonga mugi calon pinangantyan sarimbit sageda manggih kamulyan sarta karaharjan. Keparengna kula ngaturaken agunging panuwun ingkang tanpa pepindhan dhumateng Bapa/Ibu……………….……………….., bilih kula sakadang sampun kadhawuhan ndherekaken lampahing titilaksana adicara midodareni punika

Kula sakadang nglenggana anggen kula nindakaken ayahan temtu wonten tuna dungkaping atur miwah solah bawa, cecer cewet adamel kuciwa, keparenga ingkang hamengku karsa miwah para tamu paring pangsaksama.

Sumangga asesanti : Jaya jaya wijayanti mugi rahayu ingkang samya pinanggih, Nuwun.