TULADHA MANATACARA PANYINGSETAN  (PASRAH SARAT SARANA) 

I.              Ancer-ancer Rantaman Adicara Panyingsetan

1. Kaadanan (saboten-botenipun) sedinten saderengipun ijab

1.    Pambuka  

2.    Pambagyaharja

3.    Wedharing gati – Tumanggaping gati

4.    Ngaturaken sarat-sarana / panyingset

5.    Lambang kalpika (menawi wonten)

6.    Sabdatama (menawi wonten)

7.    Donga

8.    Panutup

2. Kaadanan nunggal dinten saderengipun ijab

        1.        Pambuka  

        2.        Wedharing gati – Tumanggaping gati

        3.        Ngaturaken sarat-sarana / panyingset

        4.        Pambagyaharja

        5.        Panutup

II.            Ingkang Prayogi kacawisaken :

1.    Kursi calon temanten

2.    Kursi pamengku gati tuwin calon besan

3.    Kursi tamu sacekapipun

4.    Meja kangge nampi ubarampe

5.    Meja tata dhahar

6.    Mic : sakboten-botenipun 2

III.           Para Paraga :

Tuladha hambuka adicara panyingsetan

Nuwun, para pinisepuh miwah sesepuh ingkang kinurmat, para alim ulama ingkang satuhu kinabekten, para tamu kakung-putri minulya, langkung-langkung baraya agung Bapa…………………………ingkang dipunpangarsani Bapa…………………….ingkang satuhu pantes sinugata ing pakurmatan.

Minangka purwakaning atur, sumangga kula dherekaken tansah muji syukur ing ngarsaning Gusti Ingkang Maha Asih lan Welas, ingkang sampun kesdu  ngluberaken kanugrahan  kawilujengan, kasarasan miwah katentreman satemah panjenengan sedaya lan kula pinarengaken makempal manunggal kanthi raharjaning manah.

Para tamu ingkang minulya, keparengna kula mundhi dhawuhipun Bapa……………………, kinen ndherekaken lampahing adicara ingkang badhe rinonce ing tatacara panyingsetan.

Ing ari punika…………….………katiti surya kaping………………..., Bapa…….………… sekaliyan garwa hanampi rawuhipun baraya agung Bapa……………………..sapangiring ingkang badhe hamasrahakaen  ubarampe sarat sarana palakrama.

Reroncening adicara ingkang badhe lumampah nuwun inggih :

Pinurwakan kanthi Pambuka kalajengaken Atur pambagyaharja saking ingkang hamangku karsa

Parandene adicara kaping tiga nuwun inggih Wedharing pangandikan pasrah tuwin Babaring atur panampi.

Titi laksitaning adicara kaping sekawan inggih punika Lung-tinampen sarat sarana ingkang kalajengaken adicara kaping gangsal pangageming kalpika calon temanten kekalih.

Paripurnaning ngagem kalpika panyingset tumunten rinakit adicara Wasita adi saking ingkang kinurmat Bapa Kyai / Ustadz……………………………… (menawi wonten)

Salajengipun Hastungkara utawi Donga badhe pinandhegan dening Bapa Kyai……………………….

Kanthi purnaning hastungkara brata mracihnani reroncening tatacara panyingsetan ing titi wanci punika.

Makaten sagung para tamu racikaning adicara ingkang badhe lumampah. Kanthi andhap asoring manah, mugi wonten kepareng panjenengan sedaya paring puja pangestu satemah tatacara punika saged lumampah kanthi rancag, gancar wiwit purwa, madya dumugining wasana.